Die Federasie van Afrikaanse Kultuurvereniginge (FAK) se hoofdoelstelling is die vestiging, samesnoering, handhawing en bevordering van Afrikanerbelange en die handhawing en bevordering van die Afrikaanse taal en kultuur.
Nuwe FAK-Sangbundel
Die vyf-en-sewentigste herdenking van die eerste uitgawe van die welbekende FAK-Sangbundel word in 2012 gevier. Sedert 1937 is daar vier weergawes van die bundel uitgegee. Die huidige uitgawe is in 1979 hersien en is reeds vyf keer herdruk. Na al hierdie jare is die FAK-sangbundel steeds een van dié sangbundels vir Afrikaanse musiek en daar word jaarliks sowat 500 van hierdie bundels verkoop. Die FAK beplan nou volstoom om hierdie groot mylpaal te vier met die uitgawe van ’n volgende FAK-sangbundel. Die werk word gedoen met behulp van ’n sangbundelkomitee wat bestaan uit vername rolspelers in die Suid-Afrikaanse musiekbedryf. Die nuwe sangbundel sal, soos die bestaande bundel, 400 liedjies bevat en die volle spektrum van Afrikaanse musiekgenres dek.
