Die Afrikaner en sy koerant
Julie 31, 2014
Ekonomiese- teenoor kultuurkwessies
Julie 31, 2014

deur Frederik van Dyk.

Jongmense se stem word te min gehoor oor sake wat hulle raak. Dit het tyd geword dat jy jóú stem dik maak. Die besluite wat ons vandag neem, is immers dit wat die omgewing skep waarbinne jongmense oor ’n klompie jaar van nou af moet floreer. Wat dink jy oor die sing van die Stem – was jy dalk daar en het jy saamgesing? Of uitgestap? Hoe voel jy oor Afrikaans op universiteite – sal jy dalk eerder verkies om in Engels of oorsee te studeer? Het jy ’n sterk mening oor die rol wat Afrikaners in die ekonomie speel, of oor plaasmoorde?

Maroela Media en die FAK bied jou nou ’n platform om jou sê te sê. Skryf vir ons oor enigiets wat jou na aan die hart lê of waaroor jy ’n sterk mening het; verkieslik ’n aktuele aangeleentheid. Die beste bydrae van die week word op ’n Vrydag gepubliseer op Maroela Media se meningsplatform, Die Groot Debat en op die FAK se webblad . Elke week se beste bydrae ontvang ’n geskenkpak ter waarde van R400 van Maroela Media, en boonop sal een van Die Groot Debat se gereelde skrywers, almal prominente Afrikaanse meningsvormers, jóú bydrae lees en persoonlik daarop reageer.

Die beste skrywer van elke maand ontvang ook ’n kontantprys van R500. Bydraes van ongeveer 800 tot 1 000 woorde kan gestuur word aan maroela@maroelamedia.co.za en fak@fak.org.za, met “My standpunt” in die onderwerpveld. Die beste bydraes word ook ingeskryf vir die FAK se Afrikaanse Skole-Ekspo. Trek los en skryf!

Die brief is deur ’n 17-jarige matriekseun, Frederik van Dyk, van Komatipoort, geskryf na aanleiding van “Die Stem”-debat. 

Basson se argumente rondom Steve se Stem tas mis

“Het ons moed opgegee?” deur Adriaan Basson (Beeld, 7 Julie) het betrekking.

Hopelik is my brief die laaste wat die onbenullige geteem rondom die sing deur duisende Afrikaners by vanjaar se Innibos betref.

Die argumente is gehoor: “Die Stem” is ’n onskuldige volksliedjie. Maar dit het apartheidspatsels. Maar dis sonder haatspraak. Maar dis opruiend … en, en, en …

Ons kan vir ewig debatteer oor die morele waarde rondom die sing van die ou volkslied. Ek respekteer redakteur Adriaan Basson se mening dat die lied eerstens nog apartheidskonnotasies het, en hoor ook sy vrese dat die sangers dalk op dié manier hul misnoeë met die reënboognasie te kenne gee. Ek sien egter twee grondige foute in sy argumente.

Eerstens is dit inkorrek om afleidings te maak rondom die motief vir die sing van “Die Stem”: daar was 45 000 Afrikaners en Steve. Hofmeyr het sy verskeie redes wyd bekend gemaak. Die 45 000 ander se rede weet ons nie en kan ons nie opsom nie – daar is geen manier dat hul motief dus as “rassisties”, “behoudend” of selfs “gematig nasionalisties” of enigiets anders bestempel kan word sonder om te veralgemeen en sodoende te diskrimineer nie, aangesien elke individu dalk ander motiverings gehad het om saam te sing! Dit duik op in Basson se argumente, maar selfs meer prominent in dr. Piet Croukamp se ondeurdagte reaksies.

Die belangrikste hier is dat beide Steve en die skare se optrede totaal binne die perke van grondwetlike spraakvryheid val, aangesien daar nie ’n kriesel haatspraak in “Die Stem” is nie – Basson het immers die mooi, vreedsame lirieke met sy artikel gepubliseer.

Laastens en tweedens is dit verstaanbaar dat sommige mense mag aanstoot neem, omdat “Die Stem” die konnotasie van apartheid dra. Ongelukkig dra hierdie argument van Basson geen gewig nie, aangesien hierdie gevoelens bitter subjektief relatief tot die inhoud en betekenis van “Die Stem” is. Selfs al voel die meerderheid van die land die lied dra “baggage”, maar daar is geen haatspraak in nie, mag dit gesing word. Punt. Konnotasies sonder ’n direkte verband met die wese van die simbool kan mos onmoontlik net “verban” word! Dit ruik sommer na anti-demokrasie.

Die argument van Basson klink besonder baie na Cosatu se belaglike vergelyking tussen Bokkaptein Victor Matfield se Kamoefleer-skrumpet en die kepse van die apartheidspolisie …

Daar was moontlik regses wat hatige motiverings gehad het oor die onlangse dilemma. Maar daar was ook duisendes wat net hul grondwetlike regte van spraakvryheid, vryheid tot kultuur van hul keuse en vryheid van assosiasie uitgeleef het. Mnr. Basson, dr. Croukamp en ander: ons hoor julle, maar julle aggressie is misplaas. Hierdie is demokratiese, grondwetlike Suid-Afrika, nié Polities Korrekte Vertrap Diversiteit Suid-Afrika nie. (Ek skaam my eintlik dat ek, ’n 17-jarige lightie, meer demokraties-volwasse as u dink.)

0 Comments

  1. JOHANNES sê:

    Welgedaan Frederick ek haal my hoed vir jou af en meer kry ek die indruk dat Basson van Beeld en Croucamp nie deel voel of wil wees van die Afrikanervolk se geskiedenis of toekoms drome en strewe nie.
    Dit is hulle goeie reg ,maar moet ook onthou hulle nie hulle denke op ander kan forseer nie ,en hulle moet openlik se hulle wil nie Afrikaners wees nie, en ook onthou wat DIE WOORD VAN GOD se, kennis en insig en verstaan sal aan eenvoudige mense bekend gemaak word en nie mense wat dink hulle weet alles nie.Basson veral dink hy weet alles maar is nog nat agter die ore.

  2. Pieter Pretorius sê:

    Jongman, jou heldere denke is ‘n riem onder die hart! Ek dink jy slaan die spyker op die kop. Hierdie oom is trots op jou. Doet so voort!!

  3. Willie sê:

    Goed gestel Frederik kan nie meer saam jou STEM nie.

  4. Ans Jacobs sê:

    Bravo!!! Jongeman!! Ek het moed vir hierdie land as ons jongmense sooo op hulle voete kan dink….ek wens my kleinkinders het soos jy gereageer . ONS IS WIE ONS IS (wil wees??) en niks en niemand het die reg om dit ons te misgun nie!!! Ek was nie DAAR nie, maar sou baie beslis UIT VOLLE BORS SAAMGESONG HET…Soos die skares om die rugbyveld elke keer saamsing! En ek is al ver oor die 70 jaar jonk!!

  5. Hemk Sinderdinck sê:

    Goed gestel Frederik. Hoewel ek Nederlander is volg ek die berigte oor Die Stem en in die alegemene sin al die nuus uit Suid Afrika.

  6. Truida Pretorius sê:

    Stem saam met skrywer. Steve het nie die Stem in die plek van die nuwe volkslied gesing nie. Wonder of die wat so te kere gaan daaroor die nuwe volkslied ken. Die Stem is ‘n pragtige afrikaanse lied, en behoort meer gesing te word.

  7. Dalene Botha sê:

    Ek is ‘n ouma met tien kleinkinders van wie studente is op Stellenbosch en Wellington. As ek so na hulle gesprekke luister, dan het ek groot waardering vir die ingeligte jongmense wat in hulle onderlinge verhoudinge met alle rasse, regtig nie die indruk skep dat hulle enigsins rassisties is nie. Dit voel vir my asof die mense wat so sensitief is oor rassisme, dalk skuldige gewetes het. Elke individu sal seker maar moet rekenskap gee van sy of haar optrede en houding teenoor ander mense, ongeag wie hulle is of waar hulle vandaan kom. Ek het grootgeword saam met ander bevolkingsgroepe en ook saam met hulle gewerk en sosiaal verkeer en ek het geleer dat wedersydse respek vir mekaar se kulture en wat vir hulle kosbaar is, baie belangrik is. Respek vir mekaar kan slegs plaasvind deur middel van kommunikasie op grondvlak. Deur vriendelike en bedagsame kommunikasie, leer ons mekaar ken en mekaar verstaan. Wanneer ons ‘n meerderwaardige houding teenoor ander inneem, al is dit ook die boemelaar en bedelaar op straat, dan skep ons vervreemding en vyandskap. Ons hoef regtig nie voor mekaar te kruip en gedurig verskoning te maak vir die foute van die verlede nie. Daar is geen volk op hierdie aarde, wat nie foute gemaak het nie. Ons hoef ook nie ons tradisies en gebruike prys te gee, terwille van goeie verhoudinge nie. Die volk wat dit gedoen het, het ook hul identiteit verloor. Daar is soveel goeie dinge uit ons verlede, waarop ons as ‘n nasie trots kan wees. Die verdeeldheid wat daar tussen ons is,is vir my ‘n baie hartseer storie!!!

  8. Babs sê:

    Buiten al die pragtige positiewe kommentaar oor die Stem, wil ek net sê dat van ‘n musikale oogpunt gesien hierdie ‘n komposisie is van uitstaande gehalte. Die woorde deur een van Suid Afrika se groot
    letterkundiges en digter van aansien, kon niemand met iets beters vorendag gekom het nie. Lank na dese sal die Stem nog gesing word.

  9. Gert McCarthy sê:

    Ek is trots op ‘Die Stem’…. en dit is my reg as Afrikaner om trots daarop te wees en dit te sing wanneer & waar ek wil( ek sal dit natuurlik nie op n byeenkoms van anderkleuriges doen nie, behalwe as hulle n Afrikaner fees bywoon) MAAR; ek is ook baie trots op ons jeug wat die lied wardeer as kuns en erfenis. Lank lewe Die Stem van die Afrikanervolk !

  10. hannie sê:

    Lees die nuutste artikel in Kultuur Kroniek deur Marthinus van Bart oor die komende veiling van M.L. de Villiers se ondertekende toonsetting van Die Stem van Suid-Afrika. Hy het dit in 1937 onderteken as sy inskrywing vir die FAK se kompetisie om die beste toonsetting vir C.J. Langenhoven se woorde/lied te vind. Sy toonsetting is die volgende jaar, in 1938, deur die beoordelaars van die FAK-span aangewys. Die bladmusiek is dus van besondere Africana-belang en moet ‘n veilige en waardige tuiste kry.

  11. Mense wat beweer dat Die Stem van Suid-Afrika “apartheidspatsels” dra en daarom nie meer in die openbaar gesing moet word nie, vertoon hul onkunde en gebrek aan opvoeding aangaande Afrikaans, die Afrikaner en die Afrikaanse kultuurgeskiedenis. Die Stem van Suid-Afrika is deur C.J. Langenhoven geskryf. Daar is min Suid-Afrikaners van enige herkoms, stam of klub wat selfs vandag so verlig en oopkop kan wees as wat Langenhoven was. Hy het Die Stem van Suid-Afrika geskryf as teenvoeter vir die Britse Imperialistiese volkere-lied “God Save The King”, wat in Sui-Afrika in elke landsburger se keel afgedruk is. Dit moes selfs na afloop van elke fliekvertoning in bioskope deur die gehoor gesing word, en bewaar jou siel as jy nie hartlik en met passie saamsing nie. So het die Britse Empire Afrikaners (onder andere) probeer verneder en van hul identiteit probeer beroof. So is die hele wereld oor waar die Union Jack gewapper het, die oorwonnenes gedwing om die knie voor Britannia te buig. Die Stem van Suid-Afrika was ‘n rebelse lied om aan tirannieke Britannia te wys dat sy die oseane mag regeer het, maar nooit die gees van die Afrikaner nie. Die Stem van Suid-Afrika was ‘n struggle-lied, bedoel om die kettings van Imperialistiese slawerny te verbreek. Diegene wat alegs deur ‘n apartheidsbril hul mede-landsburgers – en liedere soos Die Stem van Suid-Afrika – wil beoordeel en veroordeel, besef klaarblyklik nie dat hulle daardeur eintlik maar net onthul dat hulle hul ganse lewens- en wereldbeskouing dus te danke het aan apartheid. Sonder apartheid is hulle niks en het hulle ook niks te verklaar nie. Hoe bejammerenswaardig. Die probleem met die massamedia is dat dit ‘n stem gegee het ook aan diegene wat dit nie verdien om gehoor te word nie. My raad aan mede-Afrikaners is: Sing die Stem van Suid-Afrik so hard en uit volle bors dat daardie “apartheidsbuiksprekers” nie gehoor kan word nie. En volg dit op met “Die Lied van Jong Suid-Afrika”. Laat dit ‘n magtige dreuning wees wat wyd oor die veld gesweef kom. Sing Zuma en Zille se lofsangers stom. Laat jou STEM hoor.

  12. John Stephens sê:

    AI tog, nie alweer nie! Waarom gee ons soveel aandag aan die vyand van die Afrikaner se tirades oor dit wat vir ons as Afrikaners heilig en waardevol is? Ignoreer hulle! Hoe kan ons ag slaan op hierdie swart, oningeligte vyande van die Afrikaner?
    Ter inligting van ons Afrikanerjeug wil ek egter net daarop wys dat, anders as hulle, ons oues groot geword het met die FAK-Sangbundel waaruit ons dag vir dag in die skole gesing het. Dit was deel van ons soos dit ook deel van ons was om Bybelstudie in ons skole te beoefen. Hierdie FAK-Sangbundel het baie van ons geliefde Volksliedere bevat. Hierdie bundel bestaan reeds sedert 1937 en is ook baseer op vroeëre musiekbundels. Die Sangbundel is verskeie kere hersien en sommige liedere is vervang en melodiee verander.
    Die gewraakte Die Stem is reeds in 1918 deur C.J.Langenhoven geskryf. Lank voor enige Apartheidstories eers bestaan het. Hierdie lied is gebore na die Tweede Vryheidsoorlog toe die Wereldoorheerser, Engeland, ons Volk verinneweer het.Dis gebore uit ware Vaderlandsliefde. Vaderlandsliefde wat deesdae ‘n onbekende woord geword het in hierdie deurmekaar land.
    Hierdie lied sal altyd deur ware Afrikaners gesing word saam met ander bekende Volksliedere soos Uit die Chaos van die Eeue; Afrikaners Landgenote; Die Lied van Jong Suid-Afrika; Dierbaar Suid-Afrika en nog soortgelyke Volksliedere.
    Vir my is hierdie lied nog steeds die Volkslied van die Afrikaners. Daarom, liewe mede-Afrikaner, sing hierdie en ons ander Volksliedere uit die hart en in volle oorgawe. Niemand kan hierdie liedere ons ontneem nie! Niemand.!!

Laat 'n boodskap

error: Content is protected !!