Dubbel en Dwars Afrikaans
Augustus 5, 2015
’n Manjifieke nalatenskap: Prof. TT Cloete
Augustus 6, 2015

deur MARIETA BASSON van HTS Potchefstroom.

Dié soet taal is myne. Afrikaans vou my toe soos Laurika se moskombersie… Elke dag in my klas sien ek hoe die beiteltjie kragdadig kloof en breek en ek kan skaaf tot die eindproduk: begrip en waardering.

Selfs taalvreemde kinders geniet die ryk idioomskat , soos om hoog in die takke te wees en met Jan Tuisbly se karretjie te ry. Die vergelyking ‘so plat soos ‘n pannekoek’ of die feit dat jou ore so vuil is dat ‘n mens mielies daarin kan plant, val ook definitief nie op dowe ore nie!

Lucas se ‘Jerigo’ in die poësieklas is ‘n vreugdevolle ervaring vir sowel onderwyser as kind; ‘Liza se klavier’ as luisteroefening en ‘Bicycle sonder slot’ en, en, en – sommer vir die genot daarvan!

In watter ander taal kan jy iets soos dié sê: ‘Die jaar word ryp in goue akkerblare in wingerd wat verbruin , en witter lug wat daglank van die nuwe wind en klare son deurspoel word…’

Saam met die Psalmdigter wil ek jubel: Mooi woorde roer in my hart; ek dra my gedig voor aan die koning; my tong is soos die pen van ‘n vaardige skrywer.

0 Comments

  1. pauli berg sê:

    hoe verlang ek nou , want die taal wat die jonges praat , deurmekaar , onverstaanbaar , ag nee, waar is die dae wat taal soos ‘n lied geklink het.

Laat 'n boodskap

error: Content is protected !!