Deur te doen, blom die boom

Chris Lamprecht vereer met eerste Andrew Murray-FAK-toekenning
Mei 31, 2016
Rapportryerbeweging – Die President se visie
Mei 31, 2016

Die FAK doen wondere vir Afrikaans. Stap net ’n draai deur ons liedjietuin met sy asemrowende rose en ontdek al die geliefde ikone van die Afrikaanse musiekbedryf wat elkeen hier vereer word met sy eie roos – dink maar aan name soos Lukas Maree, Laurika Rauch en Carike Keuzenkamp, of wat van Mimi Coertse en Gé Korsten? Ons kyk egter nie net terug nie, maar ook vooruit. Die FAK belê in die opkomende Afrikaanse musieksterre deur seker te maak dat hulle die steun en bevordering ontvang wat hulle benodig om die sterre van môre te wees.

Toe die taal nog ’n saadjie was

Die ontstaan van die FAK in 1929 was ’n direkte uitvloeisel van die Afrikaner wat ’n dringende behoefte aan hoop gehad het. Toe die taal nog maar ’n saadjie was, het die behoefte aan bestaansreg reeds bestaan, ’n tuiste waar Afrikaners hul kulturele roeping kon uitleef en hul taal en kultuur kon bevorder. Dit is soos die Afrikaanse roos wat hier in die FAK se liedjietuin floreer omdat dit versorg en waardeer word.

Die drie takke van die roosboom

As ons die simboliek van dié roosboom verder voer, kan jy drie takke aan hierdie roosboom identifiseer:  Tuiste (my FAK), trots (geskiedenis) en toekoms (kultuur).

My Tuiste – My FAK

Die eerste tak is die organisasie in geheel, met die FAK se personeel, die liedjietuin; asook die Udolpho Jeugplaas wat ideaal is vir ’n Sondagskoolkamp of kuierplek vir die gesin. Dit is aan die oewers van die Vaalrivier geleë en bied vermaak met ’n groot swembad, minigolf, vlugbalbaan, springmat en 4 km-rivieroewer. Daar is te kies uit chalets, ’n gastehuis, oornagwoonstelle of slaapsale.

My Trots – My Geskiedenis

Aan die tweede tak van ons roosboom is daar dorings wat beskerm. Die FAK beskerm, bewaar en bevorder die Afrikanergeskiedenis. Ons bied ‘n verskeidenheid wonderlike bronne aan skole, tuisskolers en belangstellendes. Ons internetmuseum bied klankargiewe en fotoversamelings en artikels oor Afrikanergeskiedenis, taalgeskiedenis, letterkunde, musiek en die visuele kunste. Besoek ons gerus by www.afrikanergeskiedenis.co.za

My Toekoms – My Kultuur

Die derde tak van hierdie roosboom is die Afrikaner se kultuur. Hier bevorder ons Afrikaanse musiek, en skoolprojekte. Met ons skoolprojekte moedig ons die jonger generasie aan om ’n aktiewe bydrae tot hulle taal te maak. Reeds hier begin nuwe lote groei wat in die toekoms in hul taal en kultuur gaan blom en floreer.

Daar is ‘n opwindende internasionale toer vir tieners waartydens tien stede in Nederland, België, Switserland en Frankryk besoek word. Die studente besoek onder meer museums, universiteite, die Jan van Riebeeck- en Anne Frank-huis, die kaas-, porselein- en sjokoladefabrieke, en Beethoven se geboortehuis.

Daar is niks so lekker soos om in jou taal te kuier, musiek te luister en fees te vier nie. Kom kuier saam by die FAK Sangfees by die Voortrekkermonument met van die grootste kunstenaars in die Afrikaanse musiekbedryf.

Met ons Afrikaanse volksmusiek-CD vier ons Afrikaanse volksmusiek wat oor dekades deel geword het van ons kultuurskat. Dit bied liedjies soos die “Oukraalliedjie”(Gerhard Steyn), “Ver in die ou Kalahari” (Richard van der Westhuizen) en die warm rock-weergawe van “Blinkvosperd” deur Beeskraal.

Doen jou deel

Wanneer jy as Afrikaner aktief is vir jou taal en kultuur, blom hierdie roos. Die blom is die belangrikste deel van die roosboom, aangesien dit vir sy skoonheid waardeer word. Maar hoe hou ons hierdie hele boom aan die lewe? Met water, deur dit gereeld te snoei, en met genade van Bo. Die FAK nooi jou uit om deel te word en hierdie pragboom aan die lewe te hou. Kom vat hande en doen die regte ding saam met ons om hierdie roosboom se voortbestaan te verseker.

Artikel het verskyn in die JUIG! van Junie/Julie 2016

Liedjietuin mashoof

Comments are closed.

error: Content is protected !!