Bly lief vir my – Serenade
Desember 27, 2018
Op ’n hoë noot – Manie Jackson
Desember 27, 2018

In die 1960’s en 1970’s was dit hoogmode vir Engelssprekende kunstenaars, soos Glenys Lynne, Roy Bulkin en Billy Forrest om in Afrikaans te sing.

Nadat dit lank laas gebeur het, het Tarryn Lamb pas haar eerste Afrikaanse album vrygestel. Tarryn was die hoofsangeres van die groep Blackbyrd, wat twee albums vrygestel het en daarna ontbind het. Sy het sedertdien ook ’n draai as aktrise in Suidooster gemaak en ’n kontrak by een van die grootste Afrikaanse platemaatskappye losgeslaan.

Die eerste snit op die album, “Vier woorde”, het ’n baie groot treffer geword en is een van ’n spul wat Johan Oberholzer geskryf het. Die titelsnit, “Mal oor jou”, is seker die een snit wat haar in die Afrikaanse musiekbedryf gevestig het. “Dis nie ek nie”, nog ’n oorspronklike komposisie van Johan Oberholzer, móét ’n treffer word; dit is ’n uitstekende snit! Ewald Coleske het “Dit is my storie” geskryf; dit is nog ’n moontlike treffer. “Kalm voor die storm” was Tarryn se eerste Afrikaanse treffer nadat sy met haar solo-loopbaan begin het. Daar is net een Engelse snit op die album; Tarryn het Ed Sheeran se treffer “Perfect” saam met Kevin Leo opgeneem en dis regtig ’n uitstekende weergawe van dié internasionale treffer. “Iemand in die niemand”, nog een van Johan Oberholzer se oorspronklike komposisies, kan een van die treffers vanaf die album word. “Geheueverlies” is ’n pragtige snit wat Johan Oberholzer geskryf het; selfs hierdie snit behoort radiolugtyd te kry.

Die volgende snit, “Die afgrond”, wat sy saam met Jay opgeneem het, was reeds ’n radiotreffer en dis maklik om te verstaan hoekom. “Bring my terug” het ’n effens anderse klank, en daarom verdien dit lugtyd. “Speel”, die laaste oorspronklike snit op die album, dra ’n belangrike boodskap oor, naamlik dat ’n mens die lewe nie te ernstig moet opneem nie, en meer gereeld moet speel. Dis duidelik dat Laurika Rauch vir Tarryn ’n rolmodel is. Die laaste drie snitte op die album is liedjies wat treffers vir Laurika was, naamlik “Ek wil vir jou”, “Jy is te dierbaar” (hoeveel mense weet dat Kupido dit geskryf het?) en “Op Blouberg se strand”.

Die verskil tussen destyds se Engelssprekende kunstenaars en iemand soos Tarryn, is dat Tarryn saam met goeie liedjieskrywers werk, of dat sy geïnspireer word deur kunstenaars wat hulself reeds in die Afrikaanse mark gevestig het. Daarby is haar Afrikaanse uitspraak onberispelik en ’n mens sou nie sê sy is Engelssprekend nie. Hierdie CD is absoluut die moeite werd en dis maklik om te verstaan hoekom dit so gewild geword het.

Laat 'n boodskap

error: Content is protected !!