Einde September lei alle paaie na Potchefstroom!
April 2, 2020
Genealogiese navorsing in Suid-Afrika
April 3, 2020

Len Muller Foto: Chantelle Loots

Len Muller het pas sy musiekvideo van sy nuutste enkelsnit, “Heildronk”, vrygestel.

“Die lied laat my gelukkig voel en help my onthou dat jy nie alleen deur die lewe hoef te gaan nie. Dis die moeite werd om saam met familie en vriende te stap en nie jouself af te sonder nie … soos ek in die verlede nogal geneig was om te doen nie,” verduidelik dié blondekopster oor die goedvoel-snit wat hy saam met Jattie de Beer (met die hulp van Kaleidoskoop se Anique Jordaan) geskep het. “’n Mens is armer sonder ’n kerk, familie en gemeenskap. ’n Mens is nie ’n eiland nie…”

Len Muller Foto: Chantelle Loots

Volgens Len was sy skoonfamilie se tradisie om jaarliks ’n groot kuiergeleentheid van die Curriebekerfinaal te maak, die inspirasie agter sy nuutste vrystelling. “Die hele familie daag op vir hierdie rugbynaweek en dit is iets besonders vir my, deel hy. “Alhoewel dit aanvanklik ’n kultuurskok was, is dit nou iets waarna ek uitsien en “Heildronk” is gebore uit die feit dat ek die waarde van gemeenskap en samesyn eerstehands kon sien en ervaar.”

Len se vrou – Chanél – is ook te sien in hierdie pragtige musiekvideo. “Dit was nog altyd my vrou Chanél se droom om eendag met haar trourok in die see in te dans. Ons wou ook graag ’n paar van ons avonture saam uitbeeld en die video by van ons gunstelingplekke skiet om die intimiteit van die lied uit te beeld,” sê hy. Chanél en Nico Welgemoed was ook die kreatiewe breine agter die beeldmateriaal, wat rondom die Kaapse Skiereiland en Valsbaai verfilm is.

Hierdie opgewekte nommertjie volg in die voetspore van “Oorgenoeg”, die kunstenaar se vorige enkelsnit en video waarin hy sy frustrasie oor die armoede in die land uitspreek. Dit is deur Theo Crous van Bellville Studios vervaardig en issy eerste snit wat op al die radiostasies waarheen dit gestuur is speeltyd gekry het. Dis ook die eerste liedjie wat hy saam met sy sussie, Miemie Blaauw, opgeneem het en haar stem vul syne perfek aan.

Beide snitte vorm deel van sy opkomende album wat op die oomblik in die afrondingsfase is en later hierdie jaar vrygestel word.

Len Muller Foto: Chantelle Loots

Deesdae woon die musikant in die Kaap en voel hy bevoorreg om elke dag op sy branderplank af te skop. Buiten vir sy nuwe album, het hy onlangs ’n nuwe agentskap begin wat ander kunstenaars bestuur, soos Danie du Toit (Reënwolf), en vir hulle toere reël. Hy is ook besig om liedjies vir Caroline Grace en Kurt Darren te skryf. Die kunstenaar is ook lid van die musiekbeweging, Musiek Soos Grond, saam met Joshua na die Reën, Kaleidoskoop, Leon Gropp, Lizandra Winter en Liani Reynolds,wat in 2019 gestig is.

Kyk die video hier: https://youtu.be/Djm_Kh0Kka8

Comments are closed.

error: Content is protected !!