Lindie se kontakbesonderhede is:

Epos – lindievanzyl@fak.org.za

Tel – 012 326 8646 (w), 0844210000 (s)

Lindie is op Facebook en Twitter

Die jaarlikse FAK Prestige-aand is op 28 Oktober 2011 in die Centurion Teater gehou. Die geleentheid het opnuut bevestig dat daar steeds vele talentvolle Afrikaners is wat in ons land op vele terreine doenig is –voorwaar stof tot nadenke en dankbaarheid. Die gasspreker was Louis van der Watt, uitvoerende hoof van die Atterbury Groep. Pryswenners was soos volg:

FAK Erepenning vir Volksdiens – prof. Herman Giliomee

FAK Prestigetoekenning – Johan van Rensburg

FAK Toekenning vir Besondere Kultuurdiens – dr. Dioné Prinsloo

FAK Toekenning vir Besondere Kultuurprestasie – dr. Hans Fransen

FAK HB en MJ Thom Joernalistiekprys – Egmont Sippel

HB en MJ Thom Onderwyspryse – Sussa Ehlers en Yolandé Heymans

HB en MJ Thom Navorsingstoekenning – Morné Diederichs en Annemieke Pouwels

FAK Gawie Cilliers Junior-musiekbeurs – Bea Strydom, Laerskool Lucas Meyer, Vryheid

FAK Gawie Cilliers Hoërskool-musiekbeurs – Carli D’Alebout, Potchefstroom Gimnasium

FAK Senior musiekbeurs – Cara Kleynhans, Universiteit van Pretoria

Die FAK ondersteun graag die AfriForum Pretoria Musiekfees wat op Saterdag, 12 November 2011 by die Voortrekkermonument plaasvind.

Steve Hofmeyr, Kurt Darren, Lianie May, Jay, Elizma Theron, Sorina (Flooze van 7de Laan) en Armand Hofmeyr tel onder die 28 bekende sangers wat op 12 November 2011 gaan optree tydens AfriForum se Afrikaanse Musiekfees ter viering van Pretoria se 156ste verjaardag.  Die fees sal DV van 07:00 tot 15:00 op die terrein van die Voortrekkermonument plaasvind.  ʼn Boere-orkes sal van 15:00 tot 16:00 optree.

Toegang is GRATIS!  Geen besprekings is nodig nie.  Bring net ʼn opvoustoel en kom geniet die dag saam met AfriForum en Rekord.  Daar sal ook stalletjies met eet- en drinkgoed wees.  Geen eie alkohol word toegelaat nie.

Die volledige lys van kunstenaars wat optree is: Steve Hofmeyr, Kurt Darren, Lianie May, Jay, Elizma Theron, Sorina (Flooze van 7de Laan), Armand Hofmeyr, Vaughan Gardiner, Adam Tas, Willem Botha, Fredi Nest, Pieter Koen, Adam, Gerrie Pretorius, Dewald Wasserfall, DJ Ossewa, Pieter Smith, Mel Botes, Ghapi, Beeskraal, MD Greyling, Andries-Hendrik Potgieter, Saarkie, Jennifer Zamudio, Zandré, SA talent-wenner en twee boere-orkeste.

Van die bekendste kunstenaars gaan ook vanjaar vroeg optree om te verseker dat die dag van 07:00 tot 15:00 propvol gesinsvermaak is.

Albei hekke van die Voortrekkermonument (Eeufeesweg en Smutslaan) sal oop wees om verkeersknope te voorkom.  Indien julle enige navrae het, skakel AfriForum by 086-10-200-30.

‘n Nuwe hoogtepunt by vanjaar se fees is die Pretoria Expo, met tientalle uitstallers wat in die Voortrekkermonument se Amfiteater ʼn verskeidenheid van produkte en dienste gaan uitstal.  Vrydag kan die Expo van 14:00 tot 18:00 besoek word, maar dan geld ʼn R20-00 toegangsfooi.  Saterdag vind die Expo tydens die Musiekfees plaas en is toegang soos vir die Musiekfees, ook GRATIS.

Vir gaste wat van ver kom, bied die gastehuisvereniging genaamd “GATE” verder vanjaar 10% afslag op akkommodasie vir die naweek.  Gaste kan hulle webtuiste, www.travelgate.co.za, besoek en uit ʼn verskeidenheid van gastehuise in en om Pretoria kies.  Om vir die afslag te kwalifiseer, kontak die gastehuis van jou keuse en bevestig jou verblyf met ʼn depositobetaling en e-pos met die kode: GATE gee 10% AFSLAG aan AfriForum-gaste vir 11 en/of 12 Nov 2011.

Ulysses Tours bied ook ʼn vervoerdiens aan wat tydens die fees vir vervoer van jou blyplek na die Voortrekkermonument en terug teen R50 per persoon per rit sal sorg.*  Belangstellendes kan Jaco by 012-653-0018 of jaco@ulysses.co.za kontak.

Sien jou daar!

Die FAK ondersteun graag die volgende inisiateif van die Voortrekkermonument.

Pretoria, 7 November 2011. A.g.v. die gewilde antiek- en versamelaarsmark wat vier keer per jaar op die Voortrekkermonument Erfenisterrein aangebied word, is die jaarlikse Kersmark ook verander na ‘n antiek- en versamelaarsmark. Die Kersmark sal plaasvind op Saterdag, 19 November op die dak van die groot Amfiteater. Die mark is van 09:00 tot 15:00 en stalletjies sal ‘n kombinasie van antieke-,  en versamelbare handwerk aanbied.

Daar is 167 stalletjies wat iets vir elke liefhebber van oudhede aanbied asook ‘n groot verskeidenheid ander items wat nie gewoonlik by die antiek- en versamelaarsmark te koop is nie. Kant, klere, gietyster baddens en ‘n verskeidenheid speelgoedstalletjies sal saam met munte, medaljes, militaria, edelgesteentes, juweliersware, kunswerke, en ‘n groot verskeidenheid boeke te koop aangebied word.

Daar is kosstalletjies en ‘n restaurant beskikbaar by die mark asook ‘n paar heerlike deli-kosse. Veilige parkering is beskikbaar teen slegs R20 toegang per voertuig. Kinders kan hardloop en speel op die veilige piekniekterrein, of teen ekstra koste aan ‘n begeleide perderit deelneem.

Navrae aangaande die mark kan gerig word aan Geraldine by 012 323 1071 of by bemarking@voortrekkermon.org.za.

Suid-Afrika is wesenlik ‘n kunsmatige konstruksie. Voor 1910 het die naam geen besondere waarde opgeroep nie. Dit het geen patriotisme of ‘n gevoel van samehorigheid in mense ontketen nie. Dit was bloot ‘n geografiese area waarin daar Nederlandse-, Britse- en Voortrekker-kolonies was, asook verskillende Khoi, San en Bantoe stamme wat die land rond en bont bewoon het.

Na Uniewording het Suid-Afrika ‘n hele lewe van sy eie gekry. Die land het deel van die Afrikanervolk – ‘n nuutskepping opsig self – se kulturele simbole gevorm en is gebruik om sy nasionalistiese doeleindes te bevorder. Diegene in die Unie, en later Republiek, wat nie as Afrikaners gekategoriseer is nie, moes eenvoudig saamspeel; en in meeste groepe se gevalle was dit ‘n spel wat hul menswaardigheid brutaal aangetas het.

Alhoewel 1994 stemreg en juridiese gelykheid aan die hele land gegee het, het die nuwe regering dieselfde denkwyse van die Nasionale Party tot ‘n groot mate oorgeneem en net op nuwe maniere ‘n eng nasionalistiese agenda in Suid-Afrika begin bedryf. Konsepte soos transformasie en integrasie is op publieke en private instansies regoor die land afgedwing en het sogenaamde gonswoorde in die retoriek van ons alledaagse lewe geword.

Die Universiteit van Stellenbosch dien as ‘n skitterende voorbeeld. Daar is geweldige druk op die Universiteit vanaf die Staat en intern, vanaf  bestuurslui wat hul eie loopbane wil bevorder, om te transformeer ten einde sy demografie meer verteenwoordigend van die nasionale bevolking te maak. Alhoewel statistieke bewys dat dit nog nie veel gehelp het om rasse-diversiteit aan die Universiteit te bevorder nie, is Engels ten koste van Afrikaans by die Universiteit vir hierdie doel ingefaseer. Die feit dat swart mense amper geen historiese teenwoordigheid in die Wes-Kaap het nie en tans ‘n minderheid van die provinsie uitmaak is irrelevant. Stellenbosch Universiteit moet nog steeds daarna strewe om die demografiese samestelling van die hele land te weerspieël.

Nog ‘n voorbeeld is die Departement van Korrektiewe Dienste se beleid wat eis dat elke provinsie se personeel die demografie van die nasionale bevolking moet weerspieël. Met ander woorde, 80% van nuwe rekrute in die Wes-Kaap moet swart wees, terwyl slegs 30% van die Wes-Kaapse bevolking swart is. Weereens, dit dui op ‘n tipe sosialisties-Afrikanistiese agenda wat die ANC regering op al die land se mense wil afdwing.

Rasse-kategorieë, wat ‘n mens omtrent op alle amptelike dokumente moet afmerk, is ook ‘n voorbeeld van die regering se verwronge idee van nasiebou. Behalwe dat ‘n mens herhaaldelik aan jou ras en die regering se obsessie daarmee herinner word, is dit uiters arbitrêr en verwarrend dat die kategorieë as “White,” “Coloured,” “Asian,” en “African” gelys is. ‘n Mens kan selfs die aantyging maak dat dit grens aan Afro-fascisme. Eerstens, dit is logies onsinnig. As ‘n mens die letterlike omskrywing van hierdie kategorieë toepas, kan ‘n persoon hipoteties gesproke onder drie kategorieë val, soos ‘n Australiese Koukasiër wat Suid-Afrika toe immigreer wat tegnies wit, Asiaties en Afrikaan sal wees. Tweedens, dit is nie betekenisvol om sulke argaïese kategorieë in ‘n Suid-Afrikaanse samelewing te gebruik wat baie meer kompleks en divers as vier eenvoudige groepe is nie. Daardeur word mense geforseer om in klein, beklemmende hokkies in te pas wat eintlik ‘n skending van hul menswaardigheid is. Derdens, die feit dat “White,” “Coloured,” en “Asian” van “African” geskei is, het ‘n boosaardige rassistiese ondertoon wat impliseer dat wit, bruin en Asiatiese mense, met ander woorde meeste mense wat nie swart is nie, eintlik vreemdelinge is op die Afrika kontinent. Hierdie rassistiese ondertoon word dikwels deur die Pan-Afrikanistiese retoriek van prominente leiers soos Gwede Mantashe en Thabo Mbeki onderstreep, wat soms subtiele aantygings maak dat swart mense die enigste en ware eienaars van Suid-Afrika is.

Vervolgens is daar ook die geval van Julius Malema wat allerhande rassistiese aantygings oor wit mense maak en hulle soms dreig met geweld. Daar was geen poging van die regering af om hom te muilband tydens hierdie voorvalle nie. Hy is nou onlangs voor ‘n tugkomitee geroep, maar eers nadat hy uitsprake oor regime-verandering in Botswana gemaak het. Daar is geen teken dat die regering besorgd is oor die impak wat sy uitsprake op wit mense kan hê nie.

Hierdie tipe van inisiatiewe en gedrag van die regering vervreem minderheidsgroepe en doen geweldige skade aan hul psige. Die bestaansreg van minderheidsgroepe is voortdurend bedreig wat keer dat diesulkes regtig gemaklik in Suid-Afrika kan tuis voel en hulself ten volle ekonomies kan uitleef. Die regering se poging tot nasiebou is dus ‘n ernstige mislukking.

Die oplossing hiervoor lê by die burgerlike gemeenskap van Suid-Afrika. Daar is ‘n behoefte aan ‘n burgerregte organisasie wat nie in dieselfde slaggate trap as die vorige en huidige bedelings nie. Dit moet ‘n organisasie wees wat heeltemal afstand doen van die rasbehepte en uitgediende politieke retoriek van die verlede en wat nie in een of ander mitologiese nasie-staat agenda inkoop en maatskaplike manipulasie probeer toepas ten einde ‘n kunsmatige samehorigheid tussen mense te bevorder nie. Dit moet ‘n organisasie wees wat op een doel alleenlik gefokus is, naamlik om die beste praktyke van reg oor die wêreld in te span om inisiatiewe te ondersteun en van stapel te stuur, ten einde die beste belange van Suid-Afrika as ‘n dinamiese, komplekse, multikulturele samelewing te bevorder. Eweneens moet hierdie organisasie ook alle aksies wat hierdie doelwit in gedrang bring, luidkeels teenstaan.

Die organisasie moet toeganklik vir alle tale, kulture en godsdienste wees en gesonde verhoudinge tussen gemeenskappe en mense bou, nie soseer omdat almal Suid-Afrikaners is en een of ander patriotisme moet koester nie, maar eerder omdat ons mense is. Elkeen moet die voorreg hê om sy/haar eie identiteit onbedreig uit te leef, en op ‘n vrywillige basis kan saamwerk om sekere gemeenskaplike doelwitte, soos ekonomiese vooruitgang en veiligheid, te bevorder.

Wanneer iemand soos Malema iets rassisties kwytraak of iemand soos Abel Malan ‘n professor te lyf gaan, moet hierdie organisasie onmiddellik kan optree as verteenwoordiger van Suid-Afrikaners regoor alle sosiale grense wat dit ten sterkste veroordeel. Hierdie organisasie kan byvoorbeeld inisiatiewe fasiliteer wat studente mobiliseer wat weier om hul ras tydens registrasie aan die Universiteit af te merk. Sosiale media en die nuutste tegnologie moet vir hierdie doeleindes ingespan word. Dit is immers deel van die organisasie se doelwit om beste praktyke te benut.

Soos met die destyds UDF, moet daar soveel Suid-Afrikaners van soveel verskillende gemeenskappe deel van die organisasie wees, sodat dit ‘n geweldige invloed op regeringsbeleid kan uitoefen. Die ANC regering bied op die oomblik geen leiding aan die Suid-Afrikaanse samelewing nie. Hierdie organisasie moet dit doen en sal die potensiaal hê om regtig daarin te slaag, omdat dit aan geen party politiek, en dus aan geen historiese lojaliteite, onderworpe is nie.

Ons benodig ‘n burgerregte organisasie wat Suid-Afrika konsekwent voor op die agenda plaas, ons benodig Suid-Afrika Eerste.

Algeheel

1ste – Nico de Wet (85%) (lees sy opstel hier)

2de – Andries Opperman (82%)

3de – Elnarie Potgieter (80%)

Skole

1ste – Mienke Knipe (70%)

2de – Suretha Janasch (65%)

3de – Natalie Theron (60%)

Baie geluk aan al ons deelnemers en spesiaal aan ons wenners Nico de Wet (algeheel) en Mienke Knipe (Skole).

Luister hier na die nuusinsetsel op SABC 2 oor die vrystelling van die nuwe FAK-CD, genaamd Rooiwarm, saam met Andries-Hendrik Potgieter.

FAK en Andries-Hendrik stel ’n FAK-CD vry – ROOIWARM

Rooiwarm is die nuutste album uit Andries-Hendrik Potgieter se geledere en beloof om jonk en oud weer opnuut ‘n warm gevoel onder die hart te gee. Die album is die voorloper van die 75ste viering van die beroemde FAK Sangbundel en die vrystelling van ’n nuwe Sangbundel in 2012.

Die album is die breinkind van Dr. Danie Brink, hoof uitvoerende beampte van die FAK en Dirk van Niekerk van Noted Music. Brink, van Niekerk en ANDRIES-HENDRIK het kragte saamgesnoer om weer lewe in die ou Afrikaanse liedjies te blaas.

Die CD, ROOIWARM – Andries-Hendrik sing FAK, bestaan uit 14 verwerkings van nagenoeg 34 FAK liedjies. Bekende liedjies soos ‘Sarie Marais’ , ‘Die Alibama’ en ‘Bobbejaan klim die berg ‘ het ‘n paar verrassende nuwe klanke bygekry wat by alle generasies aanklank sal vind. Hierdie album sal gesinsvakansies op die langpad verby laat snel. Die ‘Rooiwarm’ album word amptelik op 19 Oktober by die Voortrekkermonument in Pretoria bekendgestel. Dit sal ook in meer as 400 musiekwinkels regoor die land beskikbaar wees.

Daar het nou al 1564 laerskoolleerlinge die vraestel geskryf met ‘n gemiddeld van 45%.

1860 hoërskoolleerlinge het al geskryf met ‘n gemiddeld van 35%.

Die doel van die projek is om die Bybelkennisvlakke van skoliere te toets. Die rapportryers is van mening dat daar baie vining op nasionale vlak aandag hieraan gegee moet word. Met die inligting is die Rapportryers van plan om daadwerklike oplossings te ontwikkel om hierdie uitdaging te oorkom.

Die Rapportryers stig twee nuwe korpse met jongmanne.

Die rapportryers het onlangs weer nuwe korpse gestig met jong manne. ‘n Korps in Centurion en een in Roodepoort is gestig tydens ‘n geleentheid by die Voortrekkermonument waar die Rapportryer President, Ruurd van der Wal die nuwe jong manne ingelyf het.

Tans is die fokus van die Afrikaner-geskiedenisprojek daarop gerig om die webblad uit te bou as ’n eenstop bestemming vir almal wat oor Afrikaners se geskiedenis wil (en moet) leer. Onlangse toevoegings sluit in 365 dagstukkies deur prof. Jaap Steyn van Bloemfontein en uitbreidings en alternatiewe tot die voorgestelde staatskurrikulum – ’n kurrikulum wat deur geskiedenis-kenners soms al as ’n “haat-kurrikulum” bestempel is. Binnekort verskyn daar ook dokumente van bykans 20 jaar se uitgawes van die Historia Junior Geskiedenis-tydskrif. Belangstellendes kan gerus die webblad besoek (www.afrikanergeskiedenis.co.za) en insette en reaksie stuur na boshof7@telkomsa.net