Jou kultuurtuiste!

Wie is die FAK?

Die ontstaan van die FAK in 1929 was ’n direkte uitvloeisel van die Afrikaner wat honger was om weer hoop te kry, om te kan glo en om weer die toekoms te kan sien. Toe die taal nog ’n saadjie was, het die vraag na ’n plek van behoort reeds bestaan, ’n tuiste waar Afrikaners hul kulturele roeping kan uitleef en hul taal en kultuur kan bevorder deur te doen. Dit is soos die Afrikaanse roos wat hier in die FAK se liedjietuin blom. Al hoe hierdie pragblom aan die lewe bly, is deur dié wat besig is om te werk aan die roos, dié wat dinge doen om die skoonheid van die roos te waardeer.

Die FAK het reeds van vroeg al vir Afrikaners gehelp om hul wortels te skiet, en steeds is die FAK dié organisasie wat jou toelaat om kreatief te wees in jou taal en kultuur. Die FAK is ’n toekomsgerigte kultuurorganisasie wat ’n tuiste vir die Afrikaanse taal en kultuur bied en ons trotse Afrikanergeskiedenis positief bevorder.

As ons dan nou hierdie simboliek van dié roosboom verder vat en wegbeweeg van die wortels, dan fokus ons op die FAK wat besig is om hul kulturele roeping uit te leef. ’n Organisasie wat ’n kleurvolle toekoms vir alle Afrikaners vestig. Ons kan hierdie roosboom met drie takke assosieer:  tuiste, trots en toekoms.

Die eerste tak is die organisasie in geheel, waar die FAK vir jou die Afrikaanse Liedjietuin bied waar uitskieters in die Afrikaanse musiekindustrie vereer word. Udolpho Jeugplaas wat ideaal is vir ’n jeuggroep, jou familie en vriende – Hier kan jy jou skoene uitskop en ontspan in Afrikaans. Die FAK is jou tuiste waar jy veilig kan voel in jou taal deur ’n vriendelike oproep of ’n glimlag om ’n koppie koffie, en dit alles in Afrikaans.

Aan ons tweede tak is daar meer dorings. Want hier bied die FAK vir jou ’n trots om jou Afrikaneridentiteit uit te leef deur die belangrike Afrikanergeskiedenis te beskerm, te bewaar en te bevorder. Dié doring bied beskerming vir oorlewing; nes die roos wat die bedreiging afweer, het Afrikaans in sy geskiedenis sterker anderkant uitgekom deur ’n hoop vir die toekoms.

Die derde tak van hierdie roosboom is die Afrikaner se kultuur. Hier bied die FAK ’n gevestigde fokus op die bevordering van Afrikaanse musiek, asook skoolprojekte. Die FAK het ’n lys van skoolprojekte wat reeds die jonger generasie bevorder om te doen vir hulle taal. Reeds hier groei nuwe lote wat in die toekoms gaan blom en floreer in hul taal en kultuur.

Wanneer jy as Afrikaner besig is om goed te doen vir jou taal en kultuur, is hierdie blom besig om te blom. Die blom is die belangrikste deel van die roosboom, aangesien almal die blom waardeer vir sy skoonheid. Maar hoe hou ons hierdie hele boom aan die lewe? Met water, deur gereeld die takke te snoei, met sonlig en met genade van Bo. Die FAK nooi jou uit om deel te word en hierdie hele boom aan die lewe te hou. Kom vat hande, trek handskoene aan en doen die regte ding saam met ons deur hierdie roosboom se voortbestaan te verseker.

Personeel

Dr. Danie Langner

Besturende Direkteur

012 301 1777


Wie is Danie?
Danie is ’n roepingsgedrewe kultuurpersoon wat met deursettingsvermoë en harde werk tans besig is om op vele terreine ’n groot verskil te maak. Hy is ’n gesinsman vir sy vrou en ses kinders, besturende direkteur van die FAK, tiende hoofleier van Die Voortrekkers en tussendeur staan hy ook in ’n deeltydse bedieningsooreenkoms met die NG Kerk Lyttelton in Centurion. Hy het ’n voorliefde vir geskiedenis en voltooi sy doktorsgraad in Kerkreg- en geskiedenis. Hy is die outeur van verskeie geskiedenisboeke wat insluit Op die spore van Retief, asook die verhaal van dr. NJ van der Merwe se lewe, getiteld NJ hou koers. Hy dien ook op verskeie direksies waar sy insig en leierskap ’n deurslaggewende bydrae lewer tot die bevordering van die Afrikaanse taal en kultuur. Sy lewe is ’n toonbeeld van opoffering en diens aan sy gemeenskap, ’n ware voorbeeld vir elke trotse Afrikaner om na te streef.
Waaroor kan jy hom kontak?
Samantha Müller is Danie se persoonlike assistent. Kontak haar gerus indien jy met hom in verbinding wil tree.

Ziegfried van Huyssteen

Adjunk Uitvoerende Hoof

012 301 1777


Wie is Ziegfried?
Ziegfried van Huyssteen is ’n moderne Afrikaner wat van jongs af ’n liefde vir entrepreneurskap getoon het toe hy reeds op sewejarige ouderdom albasters verkoop het en op 11 sy eerste snoepie begin het. Hy het BCom Entrepreneurskap en Ondernemingsbestuur aan die NWU se Potchefstroomkampus studeer. Ziegfried glo dat entrepreneurskap nie net gaan oor geldmaak vir eie gewin nie, maar dat kultuurorganisasies soos die FAK ook entrepreneuries en innoverend moet dink om te kan voortbestaan in die huidige klimaat en era waarin ons leef. As kulturele entrepreneur, leef Ziegfried sy roeping as entrepreneur uit deur die FAK te help uitbou tot ’n selfstandige instelling wat ’n daadwerklike impak maak onder Afrikaners en die Afrikaanse kultuurwêreld.
Waaroor kan jy hom kontak?
Indien jy enige navrae het omtrent FAK-lidmaatskap, FAK-voordele of die FAK wil ondersteun, kan jy vir Ziegfried kontak by zieg@fak.org.za

Samantha Müller

Persoonlike Assistent: Dr. Danie Langner

012 301 1777


Wie is Samantha?
As ywerige en trotse Afrikaner staan Samantha Müller haar FAK-skoene vol in die hoedanigheid as Administratiewe Bestuurder en Persoonlike Assistent tot die Besturende Direkteur, Danie Langner. Sy is mamma van drie en geniet dit om tyd saam met haar gesin te spandeer. Die FAK-vriende lê haar baie na aan die hart, daarom doen sy altyd moeite en fokus sy op detail wanneer sy FAK-funksies organiseer. Samantha geniet avontuur en haar groenvingers is gedurig in die tuin; die Afrikaanse Liedjietuin is deel van haar trots en sy nooi jou graag om hier te kom kuier.
Waaroor kan jy haar kontak?
Indien jy enige navrae het rakende dr. Danie Langner se dagboek, besprekings of navrae oor die Afrikaanse Liedjietuin, kliëntediens, klagtes en aanprysings kan jy vir Samantha ’n e-pos stuur by samantha@fak.org.za

Chrisna Nel

Publikasieredakteur

012 301 1777


Wie is Chrisna?
Chrisna Nel is van kleins af lief vir lees, woorde en natuurlik Afrikaans! Sy studeer Afrikaans op universiteit en leer uiteindelik hoe om ’n woordeboek te skryf – ’n groot droom wat hopelik nog eendag gaan waar word. Vandag is sy die Publikasieredakteur by die FAK en is betrokke by die maak van ongelooflike boeke vir Afrikaans en Afrikanergeskiedenis.
Waaroor kan jy haar kontak?
Vir enige navrae rakende www.afrikanergeskiedenis.co.za of publikasies kan jy vir Chrisna ’n e-pos stuur na chrisna@fak.org.za
 

Christoff van Wyk

Bestuurder: Udolpho Jeugplaas

012 301 1777


Wie is Christoff?
Christoff is ’n dromer en sy visie is ’n voorspoedige en florerende Afrikanergemeenskap wat vrylik hul taal en kultuur kan beoefen hier aan die Suidpunt van Afrika. Frank L Gaines het gesê: “Slegs mense wat die onsigbare kan sien, kan die onmoontlike doen,” en daarom is sy werk by Udolpho Jeugplaas ’n voortsetting van sy visie en elke dag ’n tree nader daaraan om die onmoontlike reg te kry. Christoff het na matriek ’n regsgraad verwerf by die NWU en is daarna met Leenster getroud. Hulle het saam vier kinders en is tans woonagtig in Centurion.
Waaroor kan jy hom kontak?
Akkommodasie en fasilitering vir groepe, klein of groot, vir doeleindes van spanbou, leierskapidentifisering, leierskapontwikkeling, geestelike programme, kultuur- of sportaktiwiteite of enige aktiwiteit wat sal bydrae tot die realisering van die FAK se visie. Stuur gerus ’n e-pos na christoff@fak.org.za

Barry Müller

Diensagent

012 301 1777


Wie is Barry?
Barry is ’n passievolle, kreatiewe en gedrewe avonturier. Vir langer as drie jaar al is hy ’n Diensagent by die FAK. Die konstante groei van die FAK en groter potensiële impak wat ons kan maak vir Suid-[Afrikaners] is sy doel en dryfkrag. Sy twee grootste liefdes is om deur die pragtige wêreld te reis en om sy jare se ervaring en kreatiewe denke te gebruik tot voordeel van enige projek en om sodoende die maksimum moontlike potensiaal uit elke situasie te kan kry.
Waaroor kan jy hom kontak?
Indien jy deel wil wees van hierdie trotse toekomsgerigte kultuurorganisasie en saam met ons die Afrikaanse taal, kultuur en geskiedenis wil behou en bevorder, kontak gerus vir Barry by barry@fak.org.za of by 012 3011 777

SW Calitz

Diensagent

012 301 1777


Wie is SW?
SW Calitz is ’n plattelandse seun vanaf Groblersdal. Met sy Afrikanerhart stel hy God eerste en meen dat sy lewensreis veel anders sou wees sonder Hom. As ekstrovert skroom hy nie om ’n nuwe uitdaging aan te pak nie en geniet veral avontuur in die natuur. SW glo ook dat jy daagliks ’n verskil in die lewe kan maak deur positief te wees of selfs net om kreatief te raak agter die kospotte.
Waaroor kan jy hom kontak?
Indien jy deel wil wees van hierdie trotse toekomsgerigte kultuurorganisasie en saam met ons die Afrikaanse taal, kultuur en geskiedenis wil behou en bevorder, kontak gerus vir SW by sw@fak.org.za of by 012 3011 777

Joriki de Wit

Finansiële beampte

012 301 1777


Wie is Joriki?
Kaalvoet, vrolik en ’n boeremeisie! Joriki se positiewe houding en skerp sin vir humor sal elkeen wat haar pad kruis in skerwe laat. Joriki laat jou gewoonlik rooi in die gesig met haar finansiële en wiskundeberekeninge. Sy eet Pyth vir middagete en Log vir nagereg. Sy pluk gereeld die FAK-Sangbundel nader en tokkel dan op haar kitaar – dit is ook haar slaaptydstories wat uit haar eie pen vloei wat haar dogters vroegaand laat droom.
Waaroor kan jy haar kontak?
Om jou debietorder te verhoog of vir enige ander finansiële navrae, stuur vir Joriki ’n e-pos na joriki@fak.org.za
 

Seugnet van Zyl

Komunikasiebeampte

012 301 1777


Wie is Seugnet?
Seugnet is ’n joernalis in murg en been. Sy is baie lief vir stories vertel, veral oor Afrikaans en die Afrikanerkultuur. Sy het haar BTech-gaad aan die Tshwane Universiteit van Tegnologie (TUT) verwerf en het vir agt jaar lank by die Beeld en Netwerk24 gewerk. Sy hoop om nou ook menige stories oor die FAK met ander te deel. Haar man, Kobie, en hulle seuntjie, Christiaan, is die staatmakers in haar lewe, saam met wie sy graag tyd spandeer.
Waaroor kan jy haar kontak?
Indien jy enige media of kommunikasie verwante navrae het kan jy vir Seugnet ’n e-pos stuur by seugnet@fak.org.za

Quinton Davis

Intern

012 301 1777


Wie is Quinton?
Jonk van gees, avontuurlustig en altyd gereed vir ’n uitdaging is wie Quinton Davis is. Quinton het grootgeword in Centurion en dit is reeds hier waar hy in die skoolbanke sy wilskrag en hardwerkendheid bevestig het. Om leiding te neem, is sy kompas en verhoed jou siel as jy nie saam met hom opstaan vir natuurbewaring nie. Met ’n hartklop vir Afrikanerskap, kyk Quinton positief die toekoms binne!
Waaroor kan jy hom kontak?
Jy kan met enige algemene navrae Quinton kontak by quinton@fak.org.za

Evelyn Ferreira

Navorser

012 301 1777


Wie is Evelyn?
Evelyn is ’n veelsydige mens met velerlei belangstellings wat al sy lewe lank aan die bevordering van die Afrikaanse taal en kultuur wy. Benewens sy Christenskap, is sy Afrikanerskap vir hom ’n kerndeel van sy vele identiteite as mens en as landsburger. Hy beskou homself as ’n gematigde mens wat in alles balans soek sonder om standpuntloos te wees. As kultuurmens was hy oor baie jare betrokke by ’n wye verskeidenheid aspekte van die Afrikaanse kultuur. Dit sluit in Geskiedenis- en Afrikaansonderwys, skoolhoof, taalbestuur in die professionele kultuuromgewing, musikant, koorsang-entoesias en kerkorrelis.
Waaroor kan jy hom kontak?
Vir meer inligting rakende die NP van Wyk Louw-navorsingsentrum, die FAK-Sangbundel of internasionale skakeling, stuur gerus ’n e-pos na evelyn@fak.org.za

Johan Jansen van Vuuren

Projekbestuurder

012 301 1777


Wie is Johan?
Johan Jansen van Vuuren, trotse Suid-[Afrikaner] is ’n kreatiewe boffin. Reeds op hoërskool het hy sy eie radiostasie begin, vandaar het hy Bedryfsielkunde studeer aan die Universiteit van die Vrystaat waar hy hom ook tuis gemaak het as anker van die ontbytprogram op KovsieFM. Vandag hou hy hom besig as projekbestuurder by die FAK. Die bevordering van jongleiers en die ontwikkeling van kuns en kultuur is sy roeping. Hy geniet dit om te toer, mense te probeer verstaan en wonderwerke in 48 uur te laat gebeur.
Waaroor kan jy hom kontak?
Indien jy enige bemarking of projek verwante navrae het kan jy vir Johan ’n e-pos stuur by johan@fak.org.za
 
error: Content is protected !!